*ദിലീപ് ചിത്രവുമായി പ്രിയദർശൻ. കുഞ്ഞാലി മരയ്ക്കാറിനു മുൻപ് റിലീസ്!* ചിത്രം,കിലുക്കം,വെള്ളാനകളുടെ നാട്, മിന്നാരം തുടങ്ങിയ മലയാള സിനിമയിലെ എവർഗ്രീൻ കോമഡി ചിത്രങ്ങളുടെ അമരക്കാരൻ പ്രിയദർശനും, ജനപ്രിയ നായകൻ ദിലീപും ഒരുമിക്കുന്നു. കോമഡി ട്രാക്കിൽ കഥ പറയുന്ന ഈ ചിത്രത്തിന്റെ രചന നിർവഹിക്കുന്നതും പ്രിയദർശൻ തന്നെ. ദിലീപിനൊപ്പം ബിജു മേനോനും ശ്രദ്ധേയ വേഷത്തിൽ എത്തുന്ന ഈ സിനിമ സുരേഷ് കുമാറാണ് നിർമിക്കുന്നത്. മോഹൻലാൽ പ്രധാന കഥാപാത്രമായെത്തുന്ന പ്രിയദർശൻ ചിത്രം കുഞ്ഞാലി മരക്കാറിന്റെ ഷൂട്ടിംഗ് പുരോഗമിക്കുകയാണ്. ഈ ചിത്രം അടുത്ത വർഷം പകുതിയോടെ മാത്രമേ പ്രദർശനത്തിനെത്തുകയുള്ളു. ദിലീപും ബിജു മേനോനും ഒരുമിക്കുന്ന ചിത്രം മെയ് അവസാനത്തോടെ ചിത്രീകരണം ആരംഭിക്കാനാണ് പദ്ധതിയിടുന്നത്. ഫെബ്രുവരി അവസാന വാരം പ്രദർശനത്തിനെത്തുന്ന ബി.ഉണ്ണികൃഷ്ണൻ ചിത്രം ‘കോടതി സമക്ഷം ബാലൻ വക്കീൽ’ ആണ് ദിലീപിന്റെ അടുത്ത റിലീസ്. രാമചന്ദ്ര ബാബു സംവിധാനം ചെയ്യുന്ന ‘പ്രൊഫസർ ഡിങ്കൻ’ ആയിരിക്കും അതിനു ശേഷം പ്രദർശനത്തിന് എത്തുക.
