പണ്ട് നമ്മെ ഒരുപാട് രസിപ്പിച്ചിരുന്ന ഫീൽ ഗുഡ് ടൈപ്പ് സത്യൻ അന്തിക്കാട് സിനിമകളില്ലേ ? അത് പുതിയ കാലഘട്ടത്തിന്റെ കഥ നഗര പശ്ചാത്തലത്തിൽ പറഞ്ഞാൽ എങ്ങനെയിരിക്കുമോ അതുപോലൊന്നാണ് വരനെ ആവശ്യമുണ്ട് എന്ന സിനിമ . രണ്ട് വ്യത്യസ്ത തലമുറകളുടെ പ്രണയ കഥയാണ് സിനിമ പറയുന്നത് . കാസ്റ്റിംഗ് ആണ് ഈ സിനിമയുടെ ഏറ്റവും വലിയ പ്ലസ് പോയന്റായി തോന്നിയത് . മലയാളത്തിലെ ഏറ്റവും മികച്ച നടി എന്ന് വിശേഷിപ്പിക്കാവുന്ന ശോഭനയുടെ ഒരു മികച്ച തിരിച്ചു വരവാണ് ഈ സിനിമ . ഈ പ്രായത്തിലും എന്തൊരു ഭംഗിയാണ് ഇവർക്ക് . ശരിക്കും ഇവർ ഒരുപാട് കാലം സിനിമയിൽ നിന്ന് ബ്രേക്ക് എടുക്കരുതായിരുന്നു എന്ന് തോന്നിപോയി . സുരേഷ് ഗോപിയുടെ ഏറ്റവും വ്യത്യസ്തമായ കഥാപാത്രമാണ് മേജർ ഉണ്ണികൃഷ്ണൻ . ഒറ്റപ്പെട്ട് ജീവിക്കുന്ന മേജർ ആളുകളോട് ഇടപെട്ടു തുടങ്ങിയതിന് ശേഷമുള്ള രംഗങ്ങളൊക്കെ അദ്ദേഹം ഗംഭീരമായി ചെയ്തു . പോലീസ് വേഷങ്ങളിൽ തളച്ചിട്ടത് കാരണം മലയാള സിനിമ നന്നായി ഉപയോഗപ്പെടുത്താത്ത നടനായിരുന്നു സുരേഷ് ഗോപി .സുരേഷ് ഗോപി - ശോഭന ടീമിനെ തിരിച്ചു കൊണ്ടുവന്ന സംവിധായകന് അഭിനന്ദനങ്ങൾ . ആദ്യപകുതിയിൽ സാന്നിധ്യം കുറവായിരുന്നെങ്കിലും ക്ളൈമാക്സിനോടടുത്തുള്ള സെന്റിമെന്റൽ രംഗങ്ങളിൽ ദുൽക്കർ നന്നായി സ്കോർ ചെയ്തു . കല്യാണി പ്രിയദർശനും കഥാപാത്രത്തോട് നീതി പുലർത്തിയ നല്ല പ്രകടനമായിരുന്നു . ഒരു സാധാരണ കുടുംബ-പ്രണയ കഥ കുറച്ച് പതുക്കെ പറയുന്ന ഒരു നല്ല ഫീൽ ഗുഡ് മൂവി .
